«Ак-Кула» ат майданында улуттук ат-спорт оюндары өтүүдө

Калаада Бишкек шаарынын 140 жылдык мааракесине арналган улуттук ат-спорт оюндары өтүп жатат. Бул туурасында Бишкек мэриясынын басма сөз кызматы кабарлады.

22-апрель күнү спорттун улуттук түрү көк-бөрү боюнча оюн башталган. Калаанын 140 жылдыгына арналган көк-бөрү боюнча Бишкек чемпионаты спорттун улуттук түрлөрүн жайылтуу максатында уюштурулган.

Таймашка өлкөнүн ар аймагынан келген 12 команда катышууда.

Эскерте кетсек, көк-бөрү боюнча мелдеш 27-апрелге чейин болот. 28-апрель күнү саат 11:00дө «Ак-Кула» ат майданында улуттук ат-спорт оюндарынын жабылуу аземи өтөт.

Салтанатка 300 комузчу катышып, «Маш ботой» күүсүн чертет, ошондой эле, 300 бийчи «Кыргыз бийи», «Жайлоо майрам» жана «Көчмөндөр ыры» аттуу кыргыз бийлерин аткарышат.