«Биримдик» партиясы гуманитардык жардамды саясий үгүт катары колдонууда

«Биримдик» саясий партиясы гуманитардык жардамды саясий үгүт катары колдонуп жатат. Бул тууралуу Каракол шаарынын тургуну Алена Хоменко өзүнүн Facebook-баракчасында билдирди.

Анын айтымында, азык-түлүк топтомунан тышкары - май, макарон, чай жана башкалардан турган Каракол шаарынын тургундары үчүн гуманитардык жардамга партия үгүт баракчаларын, гезит кошуп тараткан.

«Бул: «Мына силерге макарон, эми силер бизге добуш берүүгө милдеттүүсүңөр»-деген сериядан. Элге жардам берүү-бул эң жакшы, бул жардамды көрсөтүп жаткандардын баарына рахмат. Бирок, бул жардамды саясий үгүт катары колдонуу- жакшы эмес », - деди Алена Хоменко.

Ошондой эле ал Каракол аймактык шайлоо комиссиясынын ишине көңүл бурат.

«Алар иштебей жатса керек. Бирде партиянын баннерлери шаар боюнча илинип турса, эми бул көрүнүш», - деп жазган.

Белгилей кетсек, Кыргызстандын мыйзамдарында шайлоочулардын добушун сатып алгандыгы үчүн кылмыш жазасы каралган.

Шайлоочулардын добушун сатып алуу –шайлоочулардын тандоо чечимине таасир берүү багытында материалдык колдоо көрсөтүп же убада кылуу.

Эске салсак, 12-апрелде Ош, Каракол, Балыкчы, Майлуу-Суу жана Токмокто жана 25 айылдык кеңеште жергиликтүү кеңештерге шайлоолор өтүшү керек болчу. Ага катышууга 22 саясий партия арыз берген.

Өзгөчө кырдаал киргизилгенден кийин, президент Сооронбай Жээнбеков "Жергиликтүү кеңештердин депутаттарын шайлоо боюнча шайлоо процессинин этаптарын ишке ашыруу боюнча чараларды токтотуу жөнүндө" жарлыкка кол койгон.

Ага ылайык, үгүт иштери да токтотуш керек эле. Шайлоо өнөктүгү өлкө өзгөчө кырдаалдан чыккандан кийин жана токтотулган учурдан тартып башталат.