Дагы бир өлүм. Ноокаттын туругуну коронавирустан көз жумду

Кыргызстанда Коронавирус илдетинен дагы бир киши көз жумду. Бул тууралуу Республикалык штаб кабарлады.

“Өткөн сутканын ичинде Ноокаттын ооруканасында бир адам COVID-19 оорусунан каза тапты. Ал 87 жашта болгон”, - деп айтылат маалыматта.

Белгией кетсек, Кыргызстанда жалпысынан оорудан беш адам көз жумду. Ал эми коронавирустун дагы 18 жаңы учуру катталды.

Бүгүн, 10-апрелге карата Кыргызстанда COVID-19 инфекциясын жуктургандардын жалпы саны 298 кишиге жетти.  

Кыргызстанда COVID-19 вирусунун жайылышынын алдын алуу максатында Коопсуздук кеңешинин чечими менен жалпы билим берүүчү мектептердин окуучулары 16-марттан баштап эс алууга таратылган. Республика боюнча 18-марттан тартып өзгөчө кырдаал, ал эми коронавирус катталган айрым аймактарга 25-марттан баштап өзгөчө абал киргизген.

Ал эми 25-марттан тартып Бишкек, Ош, Жалал-Абад шаарларында жана Сузак, Ноокат, Кара-Суу райондорунда өзгөчө абал жарыялаган.