Жакшы кабар! Дагы 25 бейтап коронавирустан сакайып, үйлөрүнө чыгарылды

Бир сутка ичинде 25 бейтап ооруканадан айыгып, үйлөрүнө чыгарылды. Бул тууралуу коронавтируска каршы күрөш боюнча Республикалык штаб кабарлады.

• Бишкек ш. – 2
• Ош ш. – 2
• Ош облусу - 1
• Жалал-Абад облусу - 4
• Нарын облусу – 16

Бүгүн, 27-апрелге карата республика боюнча СOVID-19 инфекциясынын жаңы 13 учур катталды. Республика боюнча илдетке чалдыккандардын жалпы саны 695 кишиге жетти. Ичинен 183ү медицина кызматкерлери. Бейтапканада 292 киши дарыланууда. Ичинен 7 бейтап кайра жандандыруу бөлүмүнө түшүп калган. Оорудан 395 жаран сакайып, үйлөрүнө чыгарылса, 8 киши илдеттен көз жумду.

Коронавирус коркунучунан улам 25-марттан 15-апрелге чейин Бишкек, Ош жана Жалал-Абад шаарларынын, Ош облусунун Ноокат, Кара-Суу райондорунун, Жалал-Абад облусунун Сузак районунун аймактарына өзгөчө абал киргизилген. Ага ылайык, саат 21.00 – 06.00гө чейин коменданттык саат жарыяланган.

14-апрелде өзгөчө абалдын мөөнөтү 30-апрелге чейин узартылып, жогорудагы аймактардын катарына Нарын шаары жана Нарын облусунун Ат-Башы району да кошулду. Мындай жардыкты президент чыгарып, Жогорку Кеңеш колдоп берген.