Өкмөттүн Райымбек Матраимовго каршы берген доо арызын кароо жылдырылды

Бажы кызматынын башчысынын мурдагы орун басары Райымбек Матраимовду кызматка кайтаруу боюнча райондук соттун чечимине каршы доо арызды кароо 30-октябрга жылдырылды. Бул тууралуу Жогорку Соттун маалымат кызматынан кабарлашты.

Соттук отурум бүгүн, 26-сентябрда Бишкек шаардык сотунда каралмак. Керектүү документтердин толук эместигине байланыштуу отурум жылдырылды.

Өкмөт 17-августта Бажы кызматынын башчысынын мурдагы орун басары Райымбек Матраимовдун доосу боюнча чыккан райондук соттун чечимине карата доо арыз берген. Мурдагы өкмөт башчы Сапар Исаков Матраимовду 2017-жылдын 23-ноябрында «иши саясий жетекчиликтин чечимдерине жана жүргүзгөн саясатына каршы келет» деген жүйөө менен Бажы кызматынын төрагасынын орун басарлыгынан алган. 26-апрелде Матраимов «мени негизсиз жумуштан алды» деп Исаковду сотко берген. Матраимов жумуштан мыйзамсыз алынганын белгилеп, кайра өз кызмат ордуна дайындалуусу керектигин талап кылган.

25-июлда Биринчи Май райондук соту Райымбек Матраимовдун Мамлекеттик бажы кызматынын төрагасынын орун басары кызматына кайра коюу боюнча чечим чыгарган.