Жакшы кабар! Баткенден бир бейтап коронавирустан сакайып кетти

Баткенде 34 жаштагы аял коронавирустан айыкты. Бул тууралуу коронавируска каршы туруу боюнча Республикалык штаб кабарлады.

Күн мурун, 3-апрелде Баткен облустук ооруканасынан COVID-19 диагнозу менен жаткырылган аял илдетинен айыгып, ооруканадан чыгарылган.

“Бейтаптын абалы канааттандырарлык деп бааланууда, кайрадан алынган ПЧР анализи коронавирустун жок экенин көрсөткөн”, - деп айтылат маалыматта.

Эске салсак, 3-апрелге карата Кыргызстанда коронавирус оорусун жуктургандардын 14 жаңы учуру катталып, жалпы саны 130 кишиге жеткен.

2-апрелде илдеттен бир адам каза тапкан. Дагы 5 киши оорудан сакайып чыгышкан. 4 бейтаптын абалы оор. 1 киши реанимацияда. Калгандарынын абалы канааттандыраарлык экендиги маалымдалат.

Кыргызстанда COVID-19 вирусунун жайылышынын алдын алуу максатында Коопсуздук кеңешинин чечими менен жалпы билим берүүчү мектептердин окуучулары 16-марттан баштап эс алууга таратылган. Республика боюнча 18-марттан тартып өзгөчө кырдаал, ал эми коронавирус катталган айрым аймактарга 25-марттан баштап өзгөчө абал киргизген.

Ал эми 25-марттан тартып Бишкек, Ош, Жалал-Абад шаарларында жана Сузак, Ноокат, Кара-Суу райондорунда өзгөчө абал жарыялаган.