Актан менен Акылай балдарга акчанын баалуулугун түшүндүрүшөт. Улуттук Банктын демилгеси

Дем алыш күндөрү  «Тунгуч» жаштар театрында “Керемет көч” мультфильминин жаңы сериясы көрсөтүлдү. Өзгөчөлүгү – улуттук валютанын 25 жылдыгына жана Дүйнөлүк акча жумалыгына арналганы.

Мультфильмдин башкы каармандары Актан менен Акылай балдарга жеткиликтүү тил менен  акчанын баалуулугу, улуттук валюта, үй-бүлө казынасы жөнүндө айтып берип, акчага туура мамиле кылууну түшүндүрүшөт.

Иш-чарага мамлекеттик органдардын,  эл аралык уюмдардын жана жалпыга маалымдоо каражаттарынын өкүлдөрү  катышкан.

«Заманбап шарттарда өз акчаңды туура колдоно билүү - компьютердик сабаттуулук сыяктуу эле керектүү аспапка айланып баратат», – деп билдирди Улуттук Банк төрагасы Толкунбек Абдыгулов.

ЮНИСЕФтин  Кыргызстандагы Өкүлчүлүгүнүн башчысы  Юкиэ Мокуо балдарга жаштайынан акча маселелери тууралуу маалымат берүүнүн жана үйрөтүүнүн маанилүүлүгүн белгиледи:

«Каржылык сабаттуулук – чоңдор үчүн гана эмес, балдар үчүн да  маанилүү тема. Кыргызстандын ийгиликтүү келечеги үчүн кайсы гана тармакта болбосун окутууну кенже  курактан баштоо керек», - деди Юкиэ Мокуо.