100 миң сомго алынчу кыргызча сөздүктөр ким үчүн? Мэриянын жообу

Бишкек мэриясы 100 миң сомго сатып алчу китептер Мамлекеттик тил күнүнө карата 4 райондук администрацияга таркатылып берилет. Бул туурасында калаа мэриясынын маалымат кызматынан билдиришти.

Маалыматта: «Биринчи май, Ленин, Октябрь, Свердлов райондук администрация кызматкерлерин кыргыз тилиндеги сөздүктөр жана адабий китептер менен камсыздоо үчүн 19-августта электрондук мамлекеттик сатып алуулар боюнча порталга сынак жарыяланган. Сынактын жыйынтыгы боюнча 100 миң сомго  «Кыргыз тилинин түшүндүрмө сөздүгүнүн» 1-2 томунан 42 комплект, Чыңгыз Айтматовдун 8 томдон турган чыгармаларынын жыйнагынан 5 комплект сатылып алынып, 23-сентябрга карата 4 райондук администрацияга таркатылып берилет», -деп жазылат. 

Бул ишке мэрия жетекчилиги Кыргыз Республикасынын «Кыргыз Республикасынын мамлекеттик тили жөнүндө» Мыйзамын ишке ашыруу жана мамлекеттик тилди өнүктүрүү максатында барып жатканы айтылат.