Бишкек шаардык соту Алмазбек Атамбаевдин баш коргоо чарасы боюнча доо арызды карайт

Эртең, 16-августта Бишкек шаардык соту Алмазбек Атамбаевдин баш коргоо чарасы боюнча даттануу арызын карайт. Бул тууралуу экс-президенттин коомдук башталыштагы кеңешчиси Кундуз Жолдубаева билдирди.

Маалыматка ылайык, сотко Атамбаев өзү да катышат. Соттук отурум саат 10:00дө башталат. Белгилей кетсек, Алмазбек Атамбаев 26-августка чейин УКМКнын убактылуу кармоо жайына киргизилген. 

Sputnik.kg агенттиги экс-президенттин жактоочусу Сергей Слесаревге таянып, Алмазбек Атамбаевге эски кодекс менен караганда, 14 кылмыш иш боюнча айып тагылып жатканын жазды. 

Алар: Азиз Батукаевдин мыйзамсыз бошотулушу боюнча «Коррупция» беренеси менен ачылган иш, 7-8-августтагы Кой-Таш окуялары боюнча бир нече иш,  «Медиа Форумдун» имараты жана Бишкек ТЭЦтин модернизациясы боюнча «Коррупция» беренеси менен ачылган иш, Кой-Таштагы жер тилкесин мыйзамсыз сатып алуу жана мыйзамсыз сатуу боюнча «Коррупция» беренеси менен ачылган дагы эки иш.