Кыргыз жарандарын Сирияга жөнөтүп жүргөн адам кармалды

МУКК  кыргыз жарандарын үгүттөп, Сирияга жөнөтүп жаткан адамды колго түшүрдү. Бул туурасында аталган органдын басма сөз кызматынан кабарлашты. 

2018-жылдын 17-апрелинде Мамлекеттик улуттук коопсуздук кызматы  тарабынан ЭТУ бандиттик түзүмдөрүнүн катарын жаңы  жоокерлер менен толуктоо жана аларды КР аймагынан тышкары чыгаруу максатында республиканын жарандарынын арасында үгүттөө иш- чараларын жүзөгө ашыруу милдеттери менен келген, эл аралык террористтик уюмдардын (ЭТУ) мүчөлөрүнүн иш-аракеттерине бөгөт коюу жана аныктоо боюнча өткөрүлгөн контртеррористтик иш-чаралардын алкагында, террористтик уюмдардын биринин жалдоочусу 1982-ж.т. КР жараны «А.Э.» кармалды.

«А.Э.» ЭТУ жетекчилеринин көрсөтмөсү боюнча 2015-жылы Сирияга 4 кыргыз жаранын үгүттөп жиберген. Сириядагы куралдуу чыр-чатак аймагына жаңы күчтөрдү  жиберүү жана үгүт  иштерин жүргүзүү үчүн акыркы жылдары жакынкы четөлкөлөрдүн бирине барып, ошол жерде туруктуу жашап келген.

Бул факты боюнча Кылмыш-жаза кодексинин 375-беренеси ("Жалданмачылык") боюнча кылмыш иши козголду.

«А.Э.»  Мамлекеттик улуттук коопсуздук кызматынын  тергөө камак жайына киргизилип, тергөө жүрүп жатат.