Кыш келеби? ӨКМ алдыдагы күндөрдө кандай аба ырайы күтүлүп жатканын маалымдады

Өлкө аймагында алдыдагы күндөрү аба ырайынын температурасы кескин төмөндөйт деп билдирет Өзгөчө кырдаалдар министрлиги.

Маалыматка караганда, 16-17-октябрда мезгил-мезгили менен жаан, кар жаап, тоо этектеринде жана тоолуу райондордо кар жаашы күтүлөт, кээ бир райондордо жаан-чачын катуу жаайт.

Зымдарга жана бактарга суу кар жабышышы күтүлөт. Тоолуу райондордо жолдор тайгак жана тоңголок болуп, кар күрткүсү күтүлөт. Батыштан соккон шамалдын ылдамдыгы секундасына 18-23 метрге жетиши күтүлөт.

Абанын температурасы кескин төмөндөп: Чүй, Талас өрөөндөрүндө түнкүсүн -1…-3° суук, күндүз 0…+5° жылуу, Ош, Жалал-Абад, Баткен облустарынын өрөөндөрүндө түнкүсүн 0…-2°үшүк, күндүз +4…+9° жылуу, тоо этектеринде жана Ысык-Көл ойдуңунда түнкүсүн 0…-5° суук, күндүз 0…+5°жылуу, Нарын облусунун дыйканчылык аймактарында жана тоолуу райондордо түнкүсүн -2…-7°, күндүз 0…-5° суук, бийик тоолуу райондордо түнкүсүн -7…-12°, күндүз -2…-7° суук болушу күтүлөт.

Мындай туруксуз аба ырайы автоунаа, энергетика жана коммуналдык кызматтардын ишин жана жайлоолордо малды кармоону кыйындатат.

Өзгөчө кырдаалдар министрлиги Бишкек-Ош, Бишкек-Нарын-Торугарт сыяктуу тоолуу унаа жолдор менен сапарга чыга турган айдоочуларга сөзсүз түрдө автоунаасынын дөңгөлөгүн кышкы дөңгөлөккө алмаштырып алууну эскертет.