Москвада кыргыз жарандары уруша кетип, бирөөсү курал колдонду

Россиянын Москва шаарында эки кыргыз жараны уруша кетип, бири экинчисин көзгө атты. Бул туурасында КРнын РФдагы элчилигинен билдиришти.

Окуя 19-сентябрда саат эртең мененки 7:00дө Москва шаарынын Большая Семеновская көчөсүндө жайгашкан «Ысык-Көл» кафесинин жанында болгон. Чатак учурунда бир жаран травматикалык курал колдонуп, экинчисин көзгө аткан. Жабырлануучу №36 шаардык клиникалык ооруканага жеткирилип, ал жактан медициналык жардам алган. 

КРнын Россиядагы элчилиги Россиянын Ички иштер министрлигинин Москва шаарынын Соколиная гора району боюнча бөлүмүнө чатактын катышуучуларынын аты-жөнү жана бул иш боюнча кандай жазыктык чечим кабыл алынганы тууралуу маалымат алуу үчүн суроо жөнөттү.

Маселе элчиликтин көзөмөлүнө алынды.