Россиянын Оренбург облусунун талаасында калган 448 кыргыз жаран мекенине кайтат

Россиянын Оренбург облусунун Бузулук районунда турган 448 КР жараны Кыргызстанга келүү үчүн Россия-Казакстан чек арасынан өтүштү. Бул тууралуу Республикалык штаб кабарлайт.

Ара жолдо калган кыргыз жарандарын Бузулук районунан чек арадагы «Сагарчын – автодорожный» көзөмөл-өткөрүү пунктуна чейин алып келүү маселеси иштелип чыккан.  

“Учурда Казакстандагы КР Элчилигинин кызматкерлери тарабынан кыргызстандыктарды КР Өкмөтү камсыздаган 9 автобуска отургузуу иштери аяктоодо, алар казак жол полициясынын коштоосунда бирдиктүү колонна болуп казак-кыргыз мамлекеттик чек арасы көздөй бет алышат”, - деп айтылат маалыматта.

КР ТИМ дагы бир ирет Россияда жүргөн кыргызстандыктарды Оренбург облусуна барбоого чакырат, анткени Россия-Казакстан мамлекеттик чек арасы дагы эле жабык бойдон калууда.