Москванын борборуна Ислам Каримовдун эстелиги тургузулду

14-октябрдан 15-октябрга оогон түнү Москванын борборундагы Якиманка районунда Өзбекстандын биринчи президенти Ислам Каримовдун эстелиги пайда болду. Бул тууралуу аталган райондук кеңештин депутаты Андрей Морев Фейсбуктагы баракчасына жазды.

Москвага Каримовдун эстелигин тургузууга каршы болуп келген депутат Моревдин айтымында, эстеликти орнотуу иштери шаардыктардан жашыруун түрдө автобус жана полиция унааларынын курчоосунда түн ичинде жүргүзүлгөн. «Алар коркуп түн ичинде иштешти. Эгер коркпогондо жумуштар күндүз деле аткарылмак да», — деп жазды ал.

Быйыл январда Якиманка райондук кеңешинин депутаттары Москвага Ислам Каримовдун эстелигин тургузууга каршы чыгышкан. Change.org сайтында «Москвада Өзбекстан президенти Ислам Каримовдун эстелигин тургузууга каршы» деген тема менен кол топтоо өнөктүгү башталган. Аны ЛДПР партиясы демилгелеген.

Петициянын текстинде «Ислам Каримов президент болуп турганда Өзбекстанда орус тилдүү жашоочуларга карата агрессиялык актылар жасалып, кириллицанын ордуна латын ариби киргизилип, өлкөдөгү Улуу Ата Мекендик согушка арналган бардык мемориалдарды буздурганы» жазылган.

Бирок Москва бийлиги президенттик шайлоо күнү Ислам Каримовго эстелик тургузуу маселеси боюнча референдум өткөрүүгө уруксат берген эмес. Өзбекстандын биринчи президентинин эстелигин орнотуу тууралуу буйрукка Москванын мэри Сергей Собянин 2016-жылы 1-ноябрда кол койгон. Ага ылайык, айкел 2019-жылдын 31-декабрына чейин Якиманка районунда тургузулушу керек болчу.

Өзбекстанды 1989-жылдан бери башкарып келаткан Ислам Каримов 2016-жылы 2-сентябрда 78 жаш курагында инсульттан каза болгон. Анын сөөгү кичи мекени Самаркандга коюлган.