Муз тоңгон көлмөдө ойноп жаткан. Куткаруучулар сууга түшүп кеткен баланы сактап калышты

© КР ӨКМ

Чүй облусунун Аламүдүн районунда 15 жаштагы бала куткаруучулардын жардамы менен өлүмдөн калды. Бул тууралуу Өзгөчө кырдаалдар министрлигинен билдиришти.

Окуя кечээ, 31-январы күнү болуп өткөн. Саат 14:25те Өзгөчө кырдаалдар министрлигине Ленин айылындагы Коммунарская көчөсүнүн четинде жайгашкан көлмөдө тоңгон муздун үстүндө ойноп жаткан бала сууга түшүп кетти деген маалымат келген.  

№1 Өрт-куткаруу бөлүмүнүн куткаруучулары 5 мүнөт ичинде жетип, дароо куткарганга киришет. Өспүрүм жээктен 15-20 метр алыстыкта суу ичинде, музду карманып турган.  Куткаруучулар аркан байланып, муздун үстү менен барып чөгүп жаткан балага аркан ыргытып, тартып чыгышкан.

Учурда баланын абалы туруктуу.