Сапар Исаков: 2017-жылы пенсиянын орточо өлчөмү 5 миң 401 сомду түздү

Кыргыз Республикасында пенсиянын орточо өлчөмү 6,4 пайызга өсүп, 5 миң 401 сомду түздү. Бул тууралуу Кыргыз Республикасынын Премьер-министри Сапар Исаков бүгүн, 17-апрелде, Өкмөттүн 2017-жылдагы ишмердүүлүгү тууралуу Кыргыз Республикасынын Жогорку Кеңешинин «Республика-Ата-Журт», «Өнүгүү-Прогресс», «Ата-Мекен» фракцияларына отчет берип жатып айтты.

«Өлкөнүн адамдык потенциалын сактоо, өнүктүрүү жана жарандардын бакубаттуулук деңгээлин жогорулатуу эң биринчи милдет болуп саналат. Анын тегерегинде өлкөнү өнүктүрүүнүн калган бардык программалары түзүлөт. Жөнөкөй жарандардын жашоосу начарлай турган болсо, кандай гана экономикалык реформалар болбосун өз маанисин жоготот», - деп белгиледи Өкмөт башчы

Сапар Исаковдун айтымында, пенсиянын базалык бөлүгү 280 сомго жогорулап, 1780 сом өлчөмүн түздү, андан тышкары бюджеттик каражаттардын  эсебинен мамлекеттик жөлөкпулдарды төлөөгө 5,7 млрд сомдон ашык каражат жумшалды. Бул 2016-жылга салыштырганда 300 млн сомго же 6%га көп болгонун маалымдады.

Билим берүү секторуна 2017-жылы 33 млрд сомдон ашык каражат жумшалып, 2017-жылга бекитилген бюджетке карата 18%га көбөйгөндүгүн баса белгиледи.

«Орто билим берүү системасын маалыматташтыруу жана инновацияларды кийирүү максатында 2017-жылы бюджеттен 112 млн сом каралып, 775 мектеп Интернет тармагына кошулду. Жылдын аягында жалпы мектептердин ичинен 55 пайызына Интернет жеткирилди. Муну менен бирге мектептерди санариптик телеберүүлөр менен камсыздоого бюджеттен 74 млн сом жумшалды. Мындан тышкары донорлордун каражаты менен 1,8 млн долларга инновациялык мектептер түзүлдү», - деди Премьер-министр Сапар Исаков.