Шашылыш билдирүү! Жакынкы арада Чүй жана Бишкекте катуу шамал күтүлөт

Бишкек шаарында жана Чүй өрөөнүндө катуу шамал күтүлөт. Мындай шашылыш билдирүүнү КР Өзгөчө кырдаалдар министрлиги таратты.

Маалыматта «Бүгүн, 4-мартта жакынкы 3 саат аралыгында жана 5-мартка караган түнү Бишкек шаарында, Чүй өрөөнүндө болжол менен ылдамдыгы секундасына 15-20 метрге жеткен шамал катталышы мүмкүн» деп жазылат.

Мындан улам, жарандарды сак болууга, колдон келсе, көчөгө чыкпай турууга чакырабыз. Эски бак-дарактардын, жаңы курулуп жаткан үйлөрдүн жанынан өтүүдө абайлаңыз. Унааңызды бак түбүнө койбоңуз. 

Ошондой эле, ӨКМ билдиргендей, Талас облусунун аймагында саат 17:00дөн тартып болжол менен ылдамдыгы секундасына 15-20 метрге жеткен катуу шамал катталууда.