Шайлоо алдында айрым шаардардын жашоочуларынын саны тынымсыз өсүүдө

Ош, Токмок жана Каракол шаарларынынын жашоочуларынын саны акыркы бир ай ичинде кескин өстү. Бул тууралуу Мамлекеттик каттоо кызматы билдирет.

2019-жылы Ош шаарына 36 миң 35 жаран каттоого турса, Токмокко 9 миң 220, Караколго 5 миң киши катталган.

2020-жылдын 1-январынан тарта 11-февралына карата Ош шаарына 33 миң 805 киши катталды. Токмокко 6 миң 950, Караколго 2 миң 798 киши көчүп барды.

Мамлекеттик каттоо кызматынын төрагасынын орун басары Тилек Батырканов 13-февралда парламент жыйынында билдиргендей, Караколго 2797, Балыкчыга 489, Майлуу-Сууга 272, Токмокко 6950, Ошко 33 805 жаран аймактардан барып каттоого турду.

Баткен, Жалал-Абад, Нарын, Ысык-Көл, Чүй, Ош облустарынын аймактарындагы 26 айылдык кеңештин жана Каракол, Балыкчы, Токмок, Ош, Майлуу-Суу шаардык кеңештеринин депутаттарын шайлоо 2020-жылдын 12-апрелинде өтөт.

Парламент депутаттары шаардагы бир үйгө жүздөгөн адамдарды каттоого тургуза берүүгө мыйзамда тыюу салынбай турганын белгилеп, муну тескеш үчүн токтом же кандайдыр эреже иштеп чыгуу маселесин көтөрүштү.