Сокулуктук пенсионер улут аралык кастыкты козутууга шектелип камакка алынды

Бишкек шаарынын Биринчи Май райондук соту Сокулук районунун 55 жаштагы жашоочусу Гүлжамал Сапаралиеваны 2 айга камакка алды. Бул туурасында социалдык тармактагы баракчасында активист Аманбол Бабакулов билдирди. 

Аялды 313-берене – «улут, дин жана аймак аралык кастыкты козутууга» шектеп жатышат. 

Активист жарыялаган документте, тергөөнүн пикири боюнча Сапаралиева 17-январда «Ала Тоо» аянтында өткөн митингде кылмыш жасаганы жазылат. 23-январда ал тергөө органдары тарабынан кармалган.

Учурда Гүлжамал Сапаралиева №1 Тергөө изоляторунда тергөөнүн бүтүшүн күтүп отурат. 

Эскерте кетсек, 17-январда Бишкекте кытайларга каршы митинг өткөн. Уюштуруучуларга шаардык мэриядан саат 10:00дөн 13:00гө дейре митинг өткөрүүгө уруксат берилген. Бирок, убагы бүткөндө уюштуруучулар келген элди тарата албай калышкан. Саат 15:00дөн өткөндө аянттагы коомдук коопсуздукту камсыздап турган тартип сакчылары тартип бузгандарды четинен кармап кете баштаган.

Бардыгы болуп 21 адам кармалган. Ошол эле күнү митинг катышуучуларына 3 миң сом өлчөмүндө айып пул салуу менен үйлөрүнө кое беришкен.