Сот Алмазбек Атамбаев жана «Апрель» телеканалына каршы доо арыз боюнча чечим чыгарды

Бишкектин Октябрь райондук сотунда үч саясатчынын экс-президент Алмазбек Атамбаев жана «Апрель» телеканалына каршы берген доо арызын кароо жыйынтыкталды. 

Доогер Акматбек Келдибеков, Кеңешбек Дүйшөбаев жана Азимбек Бекназаровдордун ою боюнча экс-Президент «Апрель» телеканалынын эфири аркылуу алардын кадыр-баркына оңбогондой доо кетирди. 

Ал эми, Алмазбек Атамбаевдин жактоочусу Кантемир Турдалиев, экс-президент 2018-жылдын 10-декабрындагы маегинде айткан сөздөрүндө доогер тараптын дарегине карата жалаа, же фактыларды бурмалоо болбогонун билдирди. Демек, алардын кадыр-баркына эч кандай доо кеткен жок. 

Отурумдун акырында судья Альбина Жээнбекова чыгарган чечимге ылайык, экс-президент Алмазбек Атамбаев доогер тараптын ар бирине 100 миң сомдон төлөп берүүгө милдеттендирилди.

Ал эми, «Апрель» телеканалынан материалдык доо алынды. Бирок, эфирде төгүндөө берип, 4 миң 200 сом өлчөмүндөгү соттук чыгымды төлөөгө милдеттендирилди. 

КСДПнын расмий өкүлү Кундуз Жолдубаева партия соттун аныктамасы колго тийгенден кийин гана жогорку инстанцияга кайрылуу, же кайрылбоо маселесин чече турганын билдирди.