Жакшы жаңылык! Бишкекте балдар үчүн акысыз робототехника ийрими ачылат

Бишкекте балдар үчүн акысыз робототехника ийрими ачылат. Бул туурасында Интеллектуалдык менчик жана инновациялар мамлекеттик кызматынан билдиришти.

Ийримдин максаты – окуучулардын техникалык чыгармачылыкка кызыгуусун жогорулатуу, техникалык чыгармачылык борборлордун жетекчилеринин санариптик сабаттуулугун арттыруу, кошумча билим берүүчү уюмдардын окутуу процессинде педагогдордун робототехника боюнча билимдерин өркүндөтүү. Ага 5 жаштан 17 жашка чейинки балдар келип, катышса болот. 

Иш-чаранын жүрүшүндө LEGO, LEGO Wedo, LEGO EV3 боюнча роботторду программалаштыруу жана жыйноо мастер-класстары өткөрүлөт.

Ошондой эле көрүүсү жана угуусу начарларга жарыяланган адабий чыгармалардын жеткиликтүүлүгүн жеңилдетүү тууралуу Марракеш келишимине ылайык, «Азиздер жана дүлөйлөр» коомуна жардам иретинде жана кыргыз акын-жазуучуларынын чыгармаларын жайылтуу максатында Кыргызпатенттен чыккан 42 китептин электрондук варианты белекке берилет.

Маалыматта ийримге бардык каалоочулар келсе болоору айтылган.

Өтө турган күнү, убактысы: 1-февраль, саат 14:00

Өтө турган жери: Мамлекеттик патенттик-техникалык китепканасынын конференц-залы, 2-кабат, Эркиндик бул., 58-а