Акыйкатчы Токон Мамытов Алмазбек Атамбаевдин ден соолугу боюнча кабар алууга барбайт

Кыргызстандын акыйкатчысы Токон Мамытов УКМКнын убактылуу кармоочу жайында жаткан экс-президент Алмазбек Атамбаевден кабар алууга барбайт. Бул тууралуу ал Vesti.kg басылмасына билдирген.

Анын айтымында, мурунку мамлекет башчынын ден соолугун догдурлар күнү-түнү көзөмөлдөп турат жана УКМКга ишенбөөгө негиз жок.

Эске салсак, күн мурун, 20-февралда Алмазбек Атамбаевдин уулдары атасынын кан басымы кескин төмөндө кеткенин кабарлашкан эле. Маалыматты Алмазбек Атамбаевдин жактоочусу замир Жоошев ырастаган. Бирок УКМК экс-президенттин ден соолугу канааттандыраарлык, ага дарыгерлер көзөмөл салып жатышканын билдиришкен.

 «Догдурлар убактылуу кармоочу жайда тынымсыз кезектешип, Атамбаевдин ден соолугун көзөмөлдөп турушат. Улуттук коопсуздук кызматына ишенбей коюууга менде негиз жок », - дейт Мамытов.

Сөзүнүн акырында ал көз карандысыз дарыгерлерди тартуу маселесин айыпталуучунун жактоочулары чечиши керектигин белгиледи.