Кыргызстандык Эрбол Бакиров жаштар арасындагы күрөш боюнча дүйнө чемпиондугун алды

Словакияда өтүп жаткан күрөш боюнча жаштар арасындагы дүйнөлүк чемпионатта кыргызстандык Эрбол Бакиров алтын медалга ээ болду. Турнир Транава шаарында 17-сентябрда башталган.

Эрбол Бакиров 63 кг чейинкилер арасында күч сынашып, 1/16 финалда 91 секунд ичинде америкалык Алстон Жона Нуттераны 10:0 эсебинде жеңди. Кийинки атаандашы армениялык Погосян Грачья болуп, андан кийин германиялык атаандашы Чловелле Ван Мэйерди 13:3 эсебинде утту.

Ал эми жарым финалдык беттеште Э.Бакиров Россиянын атынан чыккан Азамат Каиров менен күч сынашып, 68 секундда жеңишти алган. 18-сентябрдагы финалдык бөлүктө кыргызстандык балбан Египеттин өкүлү Хассан Ахмед Мохамед менен беттешип, эсеп 5:0 менен аяктады.