Кыргызстандык жөө күлүк Дарья Маслова Жайкы Азия оюндарында алтын медалга татыды

Кыргызстандык жөө күлүк Дарья Маслова Индонезияда өтүп жаткан Жайкы Азия оюндарында алтын медалга ээ болду. Бүгүн, 25-августта 10 миң метр аралыкка чуркоо боюнча жарыш өттү. 

Мелдештин бул түрүнө Кыргызстандан  Дарья Маслова катышып, 8 спортчу менен күч сынашты. Жеңил атлет  10 миң метр аралыкты 32 мүнөт 7,23 секундада чуркап өтүп, 1-орунду ээледи. 2-орунду  Масловадан 4 секунда кеч келген бахрейндик Унсе Чумба ээлесе, 3-орун кытайлык спортчуга буюрду. 

Бул Кыргызстандын Жайкы Азия оюндарындагы экинчи алтын медалы. Биринчисин 24-августта жиу-житсу боюнча мелдеште Төрөкан Багынбай уулу жеңип алган. Жалпысынан өлкө капчыгында 11 медаль болду - 2 алтын, 4 күмүш, 5 коло.