Кытайда окуп жаткан кыргызстандык студенттер мекенине кайтты. Учурда алар изолятордо

Кытайда окуп жаткан алты кыргызстандык студент мекенине кайтып келди. Бул тууралуу өкмөттүн басма сөз кызматы кабарлайт.

Маалыматка караганда, бүгүн, 28-январда эртең менен алты кыргызстандык Кытайдын Үрүмчү шаарынан келишти. Алар Шиңжаң университетинин студенттери.

Оорулардын алдын алуу жана мамлекеттик санитардык-эпидемиологиялык көзөмөл департаменти бул тууралуу комментарий берди.  

“Абалы жакшы. 10-14 күн байкоодо болот. Учурда бардык студенттер атайын чатырларда (изоляторлордо), аларга дайыма медициналык көзөмөл жүргүзүлүп жатат, ден соолугу канааттандырарлык, эч кандай оорунун белгилери жок. Лабораториялык диагностикалык изилдөө жүрүп жатат”,-дейт жугуштуу ооруларды көзөмөлдөө бөлүмүнүн башчысы Динара Оторбаева.

Медицина кызматкерлеринин айтымында, бул студенттер Кыргызстанга 27-декабрда каникулга келип, 21-январда кайра Үрүмчүгө кайтышкан. Алар Бишкекке Казакстан аркылуу келди.

Алгач Кытайда катталган коронавирустан, соңку маалыматка караганда, 106 адам көз жумду, ооруп калгандардын саны 4,5 миңден ашты.