Аламүдүн районундагы акча алмаштыруучу жайды тоноп кеткендер изделүүдө

Акча алмаштыруучу жайды тоноп кеткендер изделүүдө. Бул туурасында Чүй облустук ички иштер башкармалыгынын басма сөз бөлүмү билдирди.

Окуя 23-июнда Аламүдүн районунун Ленин айылында болгон. Аталган айылда жайгашкан гы “Сталбек” аттуу акча алмаштыруучу жайды белгисиз топ карактап кеткен. 

Милициянын маалыматына ылайык, түнкү саат төрт чамасында кылмышкерлер кара түстөгү “БМВ Х-5” үлгүсүндөгү автоунаа менен акча алмаштыруучу жайдын тоскучун темир аркан менен жулуп, ичинде отургандарга травматикалык тапанчадан ок чыгарып, болгон акчаны тоноп кетишкен.

Жараат алган адамга медициналык жардам көрсөтүлүп, Кылмыш-жаза кодексинин 168-беренеси ("Карактоо") боюнча иш козголду. Учурда тийиштүү экспертизалар дайындалып, карактоого шектүү топ изделип жатат.